Андрей Поповлы
Кор ми тöдмасим тэкöд,
Сэки эг на, дерт, тöд,
Да и эз кывсьы некöн,
Мый Куратовлöн рöд.
Тайöн шуöма уна…
Водзвыв бöрйин ли, эн,
Аслад туйвизьöд мунан,
Кодöс индöма Ен.
Туйыд кыпыд и сьöкыд,
Тöдлiн радлун и нок…
Виччысьтöг суис рöкыд,
Мыйысь нэм кежлö шог.
Мырддис гозъялысь писö
Рöк...Эз ло зарни тусь.
Муза нюжöдiс кисö,
Сьöлöмнад мед эн усь.
Бурсö йöзлы дась сетны,
Мöд ног овны он мöд...
Кутчысь, нима поэтным,
Тэ - Куратовлöн рöд.